Sivretta Ski ArenaScuolPostautoTarasp-Vulpera

Cultura

Üna regiun intacta viva eir da sia cultura. Quai sun las ragischs chi sun gnüdas dattas inavant da generaziun a generaziun e chi s'han per part mantgnüdas. La vita as müda e tras quai es per part eir nossa cultura periclitada. Illa regiun Engiadina Bassa/Val Müstair però s'ha quai mantgnü amo dret bain. Ella po esser ün'attracziun insembel cun nos turissem chi dvainta uschè eir plü varià e plü interessant. Il turissem da cultura vain vi e plü attractiv ed attira giasts in nossa regiun. Ün tipic exaimpel es il "Uorsin" e'l cumün da Guarda chi giodan ün success mundial.

Chant

Il chant illa Regiun Engiadina Bassa/Val Müstair ha tradiziun. Bod mincha cumün ha ün cor masdà chi's preschainta pro festas e concerts da cumün. Ils cors virils nu sun uschè derasats. Sper il cor vallader o cor viril Engiadina Bassa as rechattan ulteriurs cors virils a Zernez ed in Val Müstair.

 

Plünavant daja fuormaziuns plü pitschnas chi's prodüan a capella. Ün'importanza han survgni eir ils cors da proget chi's preparan cuortamaing per ün arrandschamaint (cor masdà).

Musica

La musica instrumentala ha eir tradiziun in la regiun. Bod mincha cumün ha üna musica instrumentala. Eir quellas as preschaintan pro arrandschamaints e festas cumünalas, ma piglian eir part ad occurrenzas chantunalas e federalas. Implü daja pro nus fuormaziuns da musicas popularas o trubadurs chi chantan chanzuns rumantschas. Eir plü nouvas fuormaziuns da musica chantan adüna daplü chanzuns rumantschas.

Musica da giuvenils

Blers giuvens as dedicheschan a la musica instrumentala. Per gronda part sun quai scolars da la scoula da musica chi's vöglian preschantar eir al public. Da quist potenzial giuvenil profitan sgüra las musicas cumünalas. Blers giuvenils fuorman eir aignas gruppas plü pitschnas cun musica attractiva classica o moderna.

 

Quia vaja pro la pagina da la scoula da musica

Teater

l teater es stat illa Regiun Engiadina Bassa/Val Müstair adüna alch indispensabel. Blers tocs rumantschs sun gnüts s-chaffits, i dà però eir alch traducziuns. Da temp in temp daja eir gös libers.