Infuormaziuns our dal register da scussiun
- As voul El/Ella s'atschertar, cha'l nouv cliaint d'affar, fittadin o cumprader a credit saja solvent?
- S'annunzcha El/Ella per üna nouv'abitaziun, plazza da lavur o pretenda üna banca üna cumprova da solvenza?
Al fanestrigl o sün üna dumonda in scrit relascha l'uffizi da scussiun al lö da domicil opür al lö da scussiun ün extrat summaric (üsit) o cumplet dal register da scussiun. Dumondas in scrit vegnan evasas al di d'entrada. Al fanestrigl survain El immediat spiegaziuns a bocca o per scrit. Per telefon, fax o e-mail nu daja ingünas spiegaziuns.
El/ella bsögna ün extrat dal register per sai svess (per banca, abitaziun, lavur e.u.i)
Spiegaziuns vegnan dattas be sch'El/Ella ans suottametta üna carta da legitimaziun (pass, carta d'identità, legitimaziun d'ester). Nun esa visibel our dal documaint l'adressa e la dürada da dmura resp. il domicil, pretendaina implü üna quittanza da las scrittüras o üna conferma d'adressa da la controlla d'abitants. Cuosts da basa per ün'infuormaziun summarica: fr. 17.00
Nun es our dal doccumaint suottamiss visibel ingüna o ün'otra adressa, ans laschain nus sün lur giavüsch testifichar l'adressa indichada e la düradada da quella. Cuosts da basa per üna simila infuormaziun summarica: fr. 27.00
Sch'El/Ella ha abità be ün temp limità in circul da scussiun, remarchain nus la dürada e indichain l'adressa valabla.
Ingünas infuormaziuns nu daina per persunas, chi possedan üna adressa temporaria pro l'uffizi social o simils. Quistas persunas survegnan l'infuormaziun da l'uffizi da scussiun dal lö da domicil effectiv, a cundiziun chi possan muossar üna testificaziun.
Infuormaziun sur d'üna persuna/ditta
Premissa per avair invista i'l register da scussiun tenor artichel 8a (LSC): L'interess sto esser autentic, voul dir l'interess economic a l'infuormaziun da scussiun sto gnir cumprovada cun documaints (contrats, cumprova da cuolpa, attest da postaziun suottascrit). Il dret d'invista scada tschinch ons davo la finischun d'eventualas proceduras. Cunter pajamaint da fr. 9.00 retschaiva el/ella seguaintas spiegaziuns a bocca:
Scussiun | schi / na | (nomer, import total) |
Pendramaints | schi / na | (nomer, import total) |
Verlustscheine | schi / na | (nomer, import total) |
Infuormaziuns plü detagliadas vegnan dattas be in scrit a partir da fr. 17.00. Düra la spiegaziun daplü co üna mezz'ura, importa il suppelamaint da temp da fr. 40.00 per mincha mezz'ura implü. La dumonda in scrit sto cuntngair:
- Nom, prenom, adressa da la persuna chi inoltrescha la dumonda sco eir da la persuna in dumonda.
- Cumprouva d'interess autentic sur da la persuna in dumonda (guarda suot)
- Sch'El/Ella voul ün'infuormaziun sur da sai svess : guarda decleranza sura
Cumprouva d'interess autentic
Interess autentic i'l segn da l'artichel 8 LSC es, sch'El/Ella cumprova d'avair ün interess actual, particular, na be general chi's basa sül documaint. Ch'El/Ella suottametta üna dumonda in scrit cun documaints suottascrits da tuotta duos parts, (dumonda da credit, contrat, fögl da furniziun e.u.i.), ad El/Ella adressadas chartas da la cuntrapart, da las qualas resulta chi exista üna relaziun d'affar ed üna relaziun da dret. Üna pretaisa be dad üna partida, dumondas chi's basan sün discuors telefonics, squitschs da moniturs ed infuormaziuns electronicas nu bastan. Autorisats e incumbenzats d'inoltrar dumondas ston metter pro la procura sco eir la cumprova d'interess chi pertocca la correspundenta dumonda.
Artichel 8a da la ledscha federala davart la scussiun ed il concours:
- Mincha persuna chi po far valair ün dret autentic, po tour invista i'ls protocols e i'ls registers dals uffizis da scussiun e da concurs ed as laschar dar ün extrat
- Ün interess autentic es particularmaing dat, scha la dumonda d'infuormaziun sta in connex direct culla finischun o cul andamaint d'ün contrat
- Ils uffizis nun dan invista a terzas persunas sur d'üna scussiun, scha: a) la scussiun nun es valabla o gnüda abolida causa ün recuors o üna sentenza, b) sch'ün recuors dal debitur es gnü fat bun, c) scha'l creditur ha retrat sia scussiun
- Il dret d'invista da terzas persunas scada5 ons davo la finischun da la procedura. Güdischs ed uffizis administrativs pon i'l interess d'üna procedura pro els pendenta dumandar inavant extrats.